Sulfuro de Hidróxeno (H₂S)

O sulfuro de hidróxeno é un gas incoloro, inflamable, moi perigoso e cun olor parecido ao dos ovos podres. Pódese ulir incluso a niveis baixos, pero coa exposición prolongada o olfacto perde o rastro do H₂S cando as concentracións son inferiores ao nivel de perigosidade, de maneira que as persoas poden ter pouca alerta da presenza do gas en concentracións daniñas.

O H₂S emitido á atmosfera oxídase rapidamente a SO₂.

Naturais: Descomposición de materia orgánica (pantanos, turbeiras, lameiras de marea e, en menor medida, os volcáns.

Antropoxénicas: Combustións incompletas de combustibles fósiles, procesos industriais como o procesado Kraft do papel, plantas de augas residuais, fornos de coquización e fabricación de aceiro.

É un gas tóxico cuxo perigo depende tanto da duración da exposición como da concentración.

Concentracións baixas: irritación de ollos e tracto respiratorio.

Concentracións moderadas: efectos máis severos en ollos e respiración, dor de cabeza, mareos, náuseas, tose, vómitos, etc.

Concentracións altas: estado de shock, convulsións, incapacidade para respirar, coma, morte.

O método de referencia para a determinación do H₂S é o que se describe na Norma UNE-EN 14212:2013. É o mesmo que para o SO₂, pero se determina H₂S unha vez oxidado a SO₂ mediante un convertedor que transforma o H₂S a SO₂.