Dióxido de Xofre (SO2)

Que é?

O dióxido de xofre (SO2) é un gas incoloro, non inflamable e presenta un olor forte e irritante para altas concentracións (máis de 3 ppm). É un dos principais responsables da chuvia ácida, xa que cando está na atmosfera reacciona coa humidade e forma aerosois de ácido sulfúrico e sulfuroso.

Ademais de afectar á saúde, debido á deposición húmida ou seca dos compostos ácidos que orixina, tamén afecta á vexetación, a solos e é un axente causante do deterioro dos monumentos históricos.

Fontes

Naturais:  Os volcáns.

Antropoxénicas: Combustión de carburantes que conteñen xofre (carbón, fuel, gasóleos) en centrais térmicas, refinerías de petróleo, procesos industriais, tráfico de vehículos pesados, calefacción de carbón e fuel, etc.

Como afecta á saúde?

Concentracións elevadas de SO2 poden producir enfermidades respiratorias e agravar enfermidades cardiovasculares. Provoca irritación nos ollos. A inflamación do sistema respiratorio provoca tose, secreción mucosa e agravamento da asma e bronquite crónica e aumenta a susceptibilidade das persoas ás infeccións do tracto respiratorio.

Como afecta aos ecosistemas?

A deposición húmida ou seca dos compostos ácidos que orixina causa danos nas cubertas vexetais, sobre os solos, a biodiversidade, os ecosistemas acuáticos e forestais.

Pode ocasionar danos á vexetación, degradación da clorofila, redución da fotosíntese e a conseguinte perda de especies.

Como se mide?

O Real Decreto 39/2017 establece que o método de referencia para a medición de dióxido de xofre é o que se describe na Norma UNE-EN 14212:2013 “Aire ambiente. Método normalizado de medida da concentración de dióxido de xofre por fluorescencia de ultravioleta”.

Valores límite lexislados

SO2

Valor

Período

Valor límite horario para a protección da saúde humana 350 µg/m3

Valor medio en 1 h.

Non debe superarse en máis de 24 ocasións por ano civil.

Valor límite diario para a protección da saúde humana 125 µg/m3

Valor medio en 24 h.

Non debe superarse en máis de 3 ocasións por ano civil.

Nivel crítico para a protección da vexetación e dos ecosistemas 20 µg/m3

Ano civil e período invernal (1 de outubro do ano anterior a 31 de marzo do ano en curso)

Limiar de alerta 500 µg/m3

Valor durante 3 horas consecutivas en área representativa de 100 km2 ou zona ou aglomeración enteira


Logo Xunta 
Icono Creative Commons Xunta de Galicia. Información mantida e publicada en Internet pola Xunta de Galicia.
Nota legal | Mapa do portal | Contactar 2.0.0
Teléfono: +34-881-999654
Galicia