Benceno (C6H6)

Que é?

O benceno é un hidrocarburo aromático líquido e incoloro. Evapórase con moita facilidade emitindo vapores tóxicos e inflamables. Forma parte dos denominados Compostos Orgánicos Volátiles (COVs). Está composto por seis átomos de carbono e a cada un deles encóntrase enlazado un átomo de hidróxeno. Atópase no alcatrán de hulla e no petróleo, dos que se separa por destilación. A degradación do benceno na atmosfera contribúe á formación de ozono (O3).

Fontes

Antropoxénica: A fonte principal é o tráfico urbano, a evaporación de gasolinas e gasóleos durante a súa manipulación, distribución e almacenamento, a produción de diferentes compostos químicos, as emisións procedentes da combustión incompleta do carbón e de produtos derivados do petróleo e a manufactura de pinturas ou a súa utilización por calquera tipo de industria.

Como afecta á saúde?

O benceno é unha substancia canceríxena recoñecida.

Respirar benceno pode causar mareos, taquicardia, tremores, dor de cabeza e perda do coñecemento.

Os efectos adversos máis significativos dunha exposición prolongada son os danos ás células de material xenético, que poden causar cancro. A exposición crónica pode debilitar a medula ósea e causar efectos hematolóxicos como a diminución do reconto de glóbulos vermellos e brancos.

Como se mide?

O Real Decreto 39/2017 establece que o método de referencia para a medición do benceno é o que se describe na Norma UNE-EN 14662-3:2016 “Método normalizado para a medición das concentracións de benceno. Parte 3: mostraxe automática por aspiración con cromatografía de gases”.

Valores límite lexislados

BEN

Valor

Período

Valor límite para a protección da saúde humana 5 µg/m3

Ano civil


Logo Xunta 
Icono Creative Commons Xunta de Galicia. Información mantida e publicada en Internet pola Xunta de Galicia.
Nota legal | Mapa do portal | Contactar 2.0.0
Teléfono: +34-881-999654
Galicia