Amoníaco (NH₃)

O amoníaco está formado por un átomo de nitróxeno e tres de hidróxeno. Trátase dun gas incoloro, de olor moi penetrante, bastante soluble en auga e en estado líquido é facilmente evaporable. Caracterízase por ser unha base forte, corrosiva e que reacciona violentamente con ácidos, oxidantes fortes e halóxenos.

Naturais: A degradación de materia de orixe animal e vexetal.

Antropoxénicas: Degradación de lixo, uso de fertilizantes nitroxenados, procesos industriais como fabricación e tratamento de téxtiles, plásticos, explosivos, celulosa e papel, produtos de limpeza, etc.

A exposición a altas concentracións de amoníaco no aire pode producir queimaduras graves na pel, ollos, garganta e pulmóns, e en casos extremos pode provocar cegueira, dano no pulmón (edema pulmonar) e incluso a morte. A baixas concentracións pode causar tose e irritación de nariz e garganta.

O amoníaco mídese mediante un dos seguintes métodos:

• Sistemas pasivos, con captación en cartuchos adsorbentes de ácido fosfórico ou outro adsorbente adecuado e determinación no laboratorio por espectrofotometría UV-visible.
• Métodos automáticos baseados en quimiluminiscencia cunha eficacia de oxidación do convertedor superior ao 95%.
• Métodos específicos fotoacústicos.